蘇斯克查怒插騙子孫興民:罰佢冇飯食!

20210412
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
曼聯作客3比1反勝熱刺一仗,賽後焦點人物係南韓前鋒孫興民,呢位熱刺球星上半場除咗入波之外,亦有一場精彩「扮嘢」表演呃到球證同VAR,令曼聯入波被作廢,賽後受到各界炮轟,曼聯領隊蘇斯克查直指:「如果我個仔做呢啲行為,我會罰佢冇飯食!」
雖然曼聯最後贏波,但蘇斯克查對孫興民嘅行為仍耿耿於懷:「個入波完全冇問題,我哋唔應該受到詐騙。老實講如果我個仔喺呢個情況下瞓地3分鐘,仲要10個隊友幫手扶起佢,我會罰佢冇飯食,因為咁嘅行為太羞家。其實唔係我哋受到詐騙,而係球證受到詐騙,但呢次事件令球員醒覺,佢哋受到唔公平判決後作出最好嘅反應。」
對於蘇斯克查嚴厲批評,摩連奴就力撐孫興民:「我只係想講孫興民好幸運,因為佢爸爸係個比蘇斯克查更好嘅人。我自己都係爸爸,作為爸爸無論如何都要畀仔女食飯,就算要去偷都要偷嚟畀仔女食。我對蘇斯克查嘅言論好失望,我亦都同佢講咗我嘅感覺。」
不過,外界似乎一面倒認為曼聯呢球合法,前英超球證希斯分析:「麥湯米尼隻手只係輕鬆Fing到孫興民,足球場上司空見慣,完全唔足以令嗰位熱刺前鋒咁樣跌低,而且呢次事件亦唔係『明顯誤判』,VAR唔應該作出重審。」有份評述嘅堅尼、列納、奧雲、米卡李察士等前球員都指曼聯入球唔應該被取消。