阿仙奴大勝又折將　沙卡受傷歐霸凶險

足球博彩神器，每日重心提供盡在《彩報》：http://win.on.cc/football/　

阿仙奴周一(12日)凌晨英超重響勝鼓，作客包尾嘅錫菲聯輕鬆大勝3比0，不過「兵工廠」今場亦付出沉重代價，新人王布卡約沙卡下半場因傷退下火線，大腿更要即場敷冰治療，周五(16日)凌晨歐霸盃生死戰上陣成疑。

阿仙奴今場有射手奧巴美揚因病缺陣，兩大攻擊中場馬田奧迪加特同伊美路維亦受傷缺陣，但面對錫菲聯仍綽綽有餘，33分鐘憑一次美妙組織由拿卡錫迪先開紀錄，下半場再有加比爾馬天尼利同拿卡錫迪各入1球，大勝3比0終止4場不勝走勢。

美中不足嘅係，今場改踢10號位嘅布卡約沙卡下半場傷出，領隊阿迪達賽後表示：「沙卡覺得大腿唔舒服，需要被調離陣，我哋已經有幾個重要球員受傷，希望沙卡傷勢唔嚴重。我唔知沙卡受傷係咩情況，但下場歐霸盃大衛雷斯、基蘭泰亞尼肯定缺陣，馬田奧迪加特、伊美路維同布卡約沙卡都上陣成疑。」