刺激！馬體會又失分　西甲3雄只差2分

足球博彩神器，每日重心提供盡在《彩報》：http://win.on.cc/football/　

西甲冠軍爭霸進入白熱化階段，今季盤踞榜首多時嘅馬德里體育會，未能趁皇家馬德里同巴塞隆拿打生打死機會鞏固「1哥」位置，周一(12日)凌晨作客被貝迪斯逼和1比1，雖然成功重奪榜首位置，但只係領先皇馬同巴塞1分及2分，形成3強鼎立局面，季尾衝刺相當刺激。

馬體會喺蘇亞雷斯受傷下，今場開波5分鐘就由恩歷克卡拉斯高入波領先，但貝迪斯喺20分鐘就由基斯甸泰路追平。兩隊之後互有攻守，馬體會下半場早段再有祖奧菲歷斯受傷退下火線，進攻力量更見疲弱，最終兩隊未能增添紀錄，以1比1握手言和。

馬體會近4場聯賽3度失分，令榜首優勢蕩然無存，教練施蒙尼賽後信心十足表示：「每支球隊都有唔穩定嘅時間，希望經過今場和波後，馬體會嘅不穩時間已經結束，我哋今季仍然處於有利位置，皇馬同巴塞亦都已經復甦，即管睇下最後爭霸係點樣發展。」