愛華頓再失分　肥安唔認輸稱歐聯未絕望

《英超刨績王》加強版，最強數據一網打盡：http://win.on.cc/football/　

季初氣勢如虹嘅愛華頓近期陷入低谷，周二(13日)凌晨英超作客白禮頓，全場捱打下以0比0守和白禮頓，連續第4場聯賽未能贏波。愛華頓依家48分排第8位，距離第6位嘅利物浦4分，差第4位嘅韋斯咸7分，不過領隊安察洛堤就拒絕認輸，表示爭入前4嘅目標仍未絕望。

愛華頓王牌前鋒卡維特利雲今場受傷缺陣，球隊進攻即時顯得疲弱，全場只有1次中目標攻門，相反主隊白禮頓全場有23次攻門，韋碧克、比蘇馬同馬奧比等都曾經錯失黃金機會，最終兩隊踢成0比0平手，愛華頓喺英超不勝走勢增加至4場。

安察洛堤賽後表示：「依家(爭入歐洲賽)變得更加困難，不過今場拎到1分都好緊要，呢1分係球員用鬥志贏番嚟，嚟緊仲有8場聯賽要戰鬥，雖然相當困難，但愛華頓仍然處於歐聯爭奪嘅戰爭入面。」愛華頓周六(17日)凌晨會喺主場迎戰熱刺，對歐聯爭奪會係關鍵一仗。