皮里茲連任皇馬會長　施丹即交收購名單

足球博彩神器，每日重心提供盡在《彩報》：http://win.on.cc/football/　

皇家馬德里官方宣布，現年74歲嘅會長皮里茲，喺未有其他候選人競爭之下自動連任，新一屆會長任期會去到2025年。自2000年首度當選皇馬會長後，今次係佢第6度當選，期間只係離開過3年，絕對係皇馬史上最成功嘅會長。

皮里茲係皇馬走上歷史高峰嘅推動者，2000年首次上任之後即推「1年1星」計劃，2000年簽入費高、2001年簽施丹、2002年簽朗拿度、2003年簽碧咸......成功打造「銀河艦隊」。2009年皮里茲闊別3年後回歸皇馬，又再簽入C朗拿度、卡卡同賓施馬等巨星，喺皇馬地位無人能及，所以佢6度當選皇馬會長，有5次係喺冇競爭下連任。

據西班牙媒體爆料，皮里茲成功連任之後，教練施丹已即刻向佢提交今夏收購名單，表明要先引入3個球星先至會考慮續約，報道指目標人物包括西維爾中堅祖利斯古迪、雷恩中場卡馬雲加以及一位頂尖前鋒(基利安麥巴比、艾寧夏蘭特或哈利卡尼)。