狼隊黑到爆　尼圖收咧　尼維斯確診

《英超刨績王》加強版，最強數據一網打盡：http://win.on.cc/football/　

狼隊上場擊敗富咸終止英超5場不勝頹勢，可惜賽後出現連串噩耗，比賽期間傷出嘅葡萄牙翼鋒柏度尼圖，檢查後發現膝部份勢極為嚴重，今季已肯定提早收咧，就連出戰今夏歐國盃決賽周機會亦相當渺茫。另一位葡萄牙球星魯賓尼維斯，亦被確診患上新冠肺炎，已經開始10日隔離。

自魯爾占美尼斯季初重傷之後，21歲嘅柏度尼圖就成為球隊進攻靈魂，而且仲係葡萄牙國家隊重點新人之一，但今次膝部髕骨出現嚴重傷患，要進行手術根治，今季無緣再上陣。雖然未有復出時間表，但柏度尼圖喺社交網透露要抖幾個月：「我會再次克服面前嘅難關，嚟緊幾個月要離開我最愛嘅地方會非常難過，但我保證會以更強姿態回歸。」

柏度尼圖今季英超有5個入波，同魯賓尼維斯並到隊中入波最多球員，不過今季只係缺陣過1場嘅魯賓尼維斯，最新檢測入面確診新冠肺炎，按照防疫程序已展開10日隔離，周六(17日)晚對錫菲聯嘅聯賽將會缺陣。