受傷再中肺炎　沙治奧拉莫斯有排抖

足球博彩神器，每日重心提供盡在《彩報》：http://win.on.cc/football/　

將於明晚出戰歐聯8強次回合嘅皇家馬德里周二(13日)發出公告，隊長沙治奧拉莫斯確診新冠肺炎，須隔離10日；其實拉莫斯本身因為肌肉受傷養緊傷，依家再中埋肺炎，真正嘅傷病交煎！

皇馬公布，拉莫斯係球隊第7位確診人員，今年1月主帥施丹確診，今月初輪到中堅華拉尼染疫，依家加埋拉莫斯中招，皇馬一對中堅都領晒嘢。

拉莫斯最近3仗都因傷缺陣，佢嘅傷患係左腿肌肉受傷，早前國家打吡都唔出得，估計成個4月都無法復出，依家再確診肺炎，就連康復操練都做唔到，佢嘅復出日期又要再推遲。

皇馬明晚將會再鬥利物浦，首回合皇馬領先3比1，晉級機會甚高，不過拉莫斯可能歐聯4強都踢唔到，如果球隊順利入決賽，或者佢可以喺決賽復出啩。