連格上仗起孖　錘仔隊長破財找數

《英超刨績王》加強版，最強數據一網打盡：http://win.on.cc/football/　

連格上場英超梅開二度，協助韋斯咸以3比2擊敗李斯特城，計埋之前嘅入波，連格喺不足3個月內已經攻入8球，亦成功勝出同隊長麥克盧保之間嘅打賭，賭局彩頭係盧保要喺倫敦豪華酒店招待連格一晚。

麥克盧保接受訪問時表示：「當連格初次來到韋斯咸，我同佢之間有個賭約，就係如果佢喺呢段時間攻入8球，我就要喺市內一間豪華酒店招待佢一晚。」

「當佢上場入咗2球，我當時就識意到，我要破財喇，該酒店一晚使費至少500鎊(約5300港元)。」麥克盧保嘅周薪為5萬鎊，一晚酒店只係濕濕碎，佢話破財其實係誇張咗，只係賭牙骹，最重要係連格真係做得到，剥盧保棚牙。

「不過佢真係冇得彈，我哋球隊唔齊人，米查利安東尼奧同迪格蘭賴斯受傷，但連格一嚟到就幫我哋超額完成，打和阿仙奴，擊敗狼隊及李斯特城，呢個結果相當美好。」