盛傳戴巴拿將被掛牌　曼聯出手嗎？

《串績王》新登場，最強博彩盤路過關神器：http://win.on.cc/football/　

意大利傳媒報道，祖雲達斯下季勢必重組，今季表現大跌嘅阿根廷靚仔前鋒保羅戴巴拿，在合約尚餘1年情況下，勢必被掛牌出售，潛在買家包括曼聯及巴黎聖日耳門，都有機會接收。

《都靈體育報》報道，戴巴拿飽受傷病困擾，今季上陣17場僅攻入4球，係佢效力祖記6季以來最差一季，而且佢年薪唔低，最近與祖記一次續約談判中，佢嘅年薪要求係2000萬歐元(約1.82億港元)，咁即係迫祖記賣走佢啫。

仲有一個最大問題，就係佢同C朗拿度始終夾唔嚟，兩位前鋒喺祖記經歷3任主帥，但都搵唔到個最理想合作模式，戴巴拿入波同作用愈嚟愈少，令佢留喺祖記嘅機會更微。

保羅戴巴拿市價係6000萬歐元，據稱對佢有興趣嘅球會有曼聯同巴黎聖日耳門，佢下季去邊，今夏將有答案。