蘇亞雷斯或提早解約　阿積士紅軍爭住要

韓職開鑼，即上《韓職刨績王》：https://win.on.cc/football/league/kd1/index.html　

蘇亞雷斯今季由巴塞隆拿轉投馬德里體育會之後，表現大勇，協助球隊排西甲榜首。不過，西班牙《阿斯報》爆料，指如果馬體會失落今季聯賽冠軍，蘇亞雷斯就會提早解約離隊，有傳佢效力過嘅阿積士及利物浦，都有興趣簽入呢位34歲烏拉圭國腳。

蘇亞雷斯上年9月同馬體會簽約2年，但根據合約條款，「哨牙蘇」有權選出今年6月30日提早解約。雖然蘇亞雷斯喺馬體會表現唔錯，已為球隊轟入19個聯賽入球，但如果馬體會最終未能奪得冠軍，佢就好可能離隊，轉換新環境。

馬體會近4場西甲僅1勝，現時只係領先第2位皇馬1分，蘇亞雷斯早前受傷，估計要5月初先至可以復出。

傳盛阿積士及利物浦都有意簽番蘇亞雷斯，特別係荷甲勁旅阿積士以往都經常簽入舊將，加上荷甲競爭冇英超咁激烈，比較適合年紀已大嘅蘇亞雷斯。不過，蘇亞雷斯亦唔排除返回南美洲搵食，踢到掛靴為止。