科頓晉級後向麥巴比挑機　原來係關公搞鬼

《串績王》新登場，最強博彩盤路過關神器：http://win.on.cc/football/　

曼城淘汰多蒙特殺入歐聯4強，菲爾科頓攻入致勝球KO同場對手、挪威新人王艾寧夏蘭特，賽後佢個社交網站有個帖文留言：「麥巴比，你準備好未？」向另一超新星麥巴比挑機。不過科頓事後否認發帖，而係幕後公關所為。

曼城晉級後，4強對手就係巴黎聖日耳門，佢贏咗多蒙特，再向麥巴比挑機，大有先斬夏蘭特，再破麥巴比嘅氣勢，真係夠晒霸氣。其實如果發帖人係伊巴謙莫域，球迷會覺得好正常，仲會等睇好戲添，但依家挑機人係菲爾科頓，一位未紅嘅新星，網民紛紛發話：「你憑什麼？」

帖文出街後，科頓心知不妙，連隨刪帖，並立即向外澄清，表示帖文並非佢親自發出，而係經理人團隊委托公關公司代辦，該公關公司志在掀起話題同搞氣氛，勢估唔到會引發「關公災難」。

據講菲爾科頓平時為人好低調，除咗去年9月爆出「冰島醜聞」外，一向形象都係乖乖仔，絕對唔會向麥巴比挑機咁無禮。