卡雲尼顯身價 曼聯再入4強誓破魔咒

20210416
東網電視
更多新聞短片
《英超刨績王》加強版,最強數據一網打盡:http://win.on.cc/football/ 
歐霸盃4強誕生!曼聯周五(16日)凌晨喺歐霸盃8強次回合,主場2比0輕取CF格蘭納達,兩回合合計大勝4比0晉級,準決賽將會同意甲勁旅羅馬交鋒。今次係蘇斯克查執教曼聯後,第5次殺入盃賽4強,不過佢哋之前4次都入唔到決賽,今次要打破魔咒,或者要靠卡雲尼打救!
首回合作客都贏2比0嘅曼聯,返到主場繼續強陣出擊,開波6分鐘就有近況大勇嘅卡雲尼窩利抽入,大局已定之下「紅魔鬼」未見特別肉緊,最終喺完場前靠對手後衛捷西斯華利祖擺烏龍贏多球,兩回合總比賽贏4比0晉級。
蘇斯克查上季帶領曼聯殺入歐霸盃、英足盃同英聯盃4強,可惜通通未能再進一步,今季英聯盃殺入4強亦係同一命運,今次歐霸盃係蘇斯克查領軍第5度闖入盃賽4強,當然希望可以打破魔咒。
曼聯要喺歐霸盃拎到好成績,卡雲尼將會係關鍵人物,今場入波係佢歷來歐洲賽第50球,亦係自2010年開始連續第11季歐洲賽入波。據英國《太陽報》報道,卡雲尼近期嘅表現同狀態,已說服曼聯向佢開出一張1年新約,下季有望繼續為曼聯效力。