屈福特升班在即　準備搵楊格回巢

足球博彩神器，每日重心提供盡在《彩報》：http://win.on.cc/football/　

英冠「大黃蜂」屈福特現居聯賽第2，好有機會升班重返英超，英國《每日郵報》報道，屈福特已着手為來季組班，其中最重磅收購，就係希望重召艾殊利楊格歸隊。

英冠尚餘5輪，排第2嘅屈福特以82分領先第3位史雲斯7分，只要再贏3場就可確定重返英超，所以佢哋都開始着手為來季升班後部署，會方睇中人選係艾殊利楊格，認為以佢嘅英超豐富經驗，對屈福特升班後穩住大局有莫大幫助。

艾殊利楊格於屈福特青訓出身，2003至07年為一隊在英甲、英冠及英超上陣110場入22球，之後轉投阿士東維拉，5年上陣190場入38球，2011年加盟曼聯，效力9季上陣261場入19球，英超上陣接近500場，有佢做定海神針，班隊友都冇咁驚。

今年7月將滿36歲嘅楊格，在意甲效力兩季後打季今夏離開國際米蘭，去向未定，依家可能因為屈福特而重返英超，協助球會帶新人，如果因為咁加入球會管理層，個故事都就好完美嘞。