杜曹打破宿命　首勝哥帥兼創造150年歷史

最強博彩盤路過關神器《串績王》：http://win.on.cc/football/　

車路士喺英足盃4強擊敗曼城，車仔領隊杜曹教波生涯第6次同哥迪奧拿交鋒，終於首次擊敗對方，並成為英足盃創立150年以來，首位帶隊打入決賽嘅德國籍主帥。

杜曹曾經喺德國同當時拜仁慕尼黑教練哥迪奧拿5次交手，只錄得1和4負，包括2016年德國盃決賽，帶領多蒙特互射12碼不敵拜仁。兩人今場首次喺英格蘭賽場交鋒，杜曹憑穩守突擊戰術，終於威番1次。

杜曹1月尾成為車路士領隊之後，迅速執靚防線，佢領軍之下19場比賽，有14場保持不失球，屬於歐洲5大聯賽同期最佳防守球隊，今場亦令以擅長進攻戰術見稱嘅哥迪奧拿束手無策。

賽後杜曹亦好滿意自己嘅部署：「良好嘅防守源於控球，冇失波並非幸運，而係因為我哋嘅努力。」車路士上屆英足盃決賽不敵阿仙奴，就睇下杜曹今屆能否協助球隊一嘗冠軍滋味。