「小球會」做大事　李斯特城入英足盃決賽

最強博彩盤路過關神器《串績王》：http://win.on.cc/football/　

喺歐超聯成立嘅陰霾籠罩下，未有如Big 6獲邀參賽嘅「小球會」李斯特城，就用表現證明自己唔差得過傳統豪門，周一(19日)凌晨英足盃4強戰鬥修咸頓，憑住近況大勇嘅伊恩拿祖一箭定江山，以1比0贏波，時隔52年後再度殺入英足盃決賽。

排緊英超第3位嘅李斯特城，喺溫布萊4,000名入場觀眾面前展示實力，控制戰局下喺55分鐘攻入唯一入波，當時占美華迪左路殺落底線傳中，伊恩拿祖第1腳射門省中人，但個波彈返落佢腳下，第2次再射終於得手。修咸頓攻勢疲乏，全場冇任何一次中龍射門，最終以0比1飲恨。

李斯特城對上一次殺入英足盃決賽已經係1969年，今屆決賽會喺5月15日舉行，李斯特城會同車路士爭奪冠軍寶座。足智彩冠軍賠率，車路士有1.43倍，李斯特城2.60倍，車仔近5屆有4次打入決賽，並於2017/18年球季奪冠，自然被睇高少少。