祖雲達斯冇C朗未贏過　周中快車點算好？

美職開鑼，即上《美職刨績王》：https://win.on.cc/football/league/mls/index.html　

周日(18日)晚意甲，祖雲達斯喺C朗受傷缺陣之下，作客0比1不敵阿特蘭大，聯賽前4之位危危乎。值得一提，C朗今季意甲4次缺陣，祖雲達斯未贏過，只有3和1負，意甲周中加開快車，如果C朗未能復出，祖記隨時又會失分。

保羅戴巴拿今場代替C朗嘅正選位置，但表現麻麻，踢到68分鐘就被換走。祖記攻勢亦唔多，更加喺87分鐘失守，阿特蘭大後備上陣嘅中場馬利路夫斯基離門約25碼，勁射入網，就憑呢球世界波絕殺祖記。

阿特蘭大贏波之後，力壓祖雲達斯，升上第3位。祖記現時只領先第5位拿玻里2分，而第6位拉素雖然落後祖記4分，但踢少1場，有機會拉近至1分距離。

祖雲達斯將於周四(22日)凌晨意甲主場對帕爾馬，一旦C朗未能趕及復出，恐怕祖記鋒線又會死火。