美斯即將同巴塞續約2年　阿古路減薪加盟

最強博彩盤路過關神器《串績王》：http://win.on.cc/football/　

英超BIG6退出歐超聯，家陣剩番西甲同意甲嘅六支球隊，有消息指屬於騎牆派嘅巴塞都傾向退出，但球王美斯仍然喺傳媒焦點，佢轉會嘅「連續劇」似乎已到劇終，隨着巴塞隆拿新會長拉波塔上任之後，阿根廷球王留隊嘅機會就愈嚟愈大，據悉上個禮拜美斯捧走西班牙盃之後相當Happy，有消息指美斯將會同巴塞續約兩年。

呢個結局都係外界嘅預算之內，美斯嘅合約到今個賽季完約，如果佢最終動筆簽紙，將會效力巴塞到36歲，將自己嘅整個職業生涯奉獻咗巴塞。

有消息指美斯嘅老婆安東莉娜最近喺巴塞市搵樓，西班牙傳媒報道喺加泰羅尼亞南部沿海地區Garraf為屋企人搵新居，呢個小城距離巴塞市只係半粒鐘。美斯老竇早排又飛到巴塞，種種迹象可見，美斯留隊極高。

此外，阿古路極有可能加盟，有消息透露阿古奴同巴塞已達成兩年協議，亦接受減薪同埋做後備嘅條件，能夠屈就做後備，可見阿古路為咗同老友美斯一齊踢波嘅心願有幾強烈。