華Dee破入球荒　李斯特城前4好穩陣！

足球博彩神器，每日重心提供盡在《彩報》：http://win.on.cc/football/　

啱啱殺入英足盃決賽嘅李斯特城，周五(23日)凌晨英超主場以3比0大炒西布朗，向來季出戰歐聯邁進一大步。李斯特城依家穩佔前4位，領先之後嘅車路士同韋斯咸4分，而且王牌前鋒占美華迪今場打破入球荒，重蹈上季季尾「大冧檔」覆轍機會唔大。

李斯特城上季一直穩佔前4，但去到最後9輪狂跌18分，最終只係拎到第5位。李斯特城近2場聯賽輸波，令人擔心佢哋又再冧檔，不過今場對西布朗就大發神威，占美華迪23分鐘先開紀錄，3分鐘後莊尼伊雲斯再入1球，狀態巔峰嘅伊恩拿祖36分鐘埋齋，李斯特城就憑上半場3個入波大勝3比0。

占美華迪今場1射1傳，打破自己連續11場比賽冇入波嘅入球荒，加上伊恩拿祖攻入近8場第11球，呢對前鋒組合威力相當得人驚。對於歐聯在望，領隊羅渣士賽後表示：「我唔會諗其他球隊嘅成績，只會專注踢好自己嘅波，我哋好想以前4名衝線，但依家一切都充滿變數。」