阿仙奴班主拒賣盤　承諾孭起歐超聯罰款

美職開鑼，即上《美職刨績王》：https://win.on.cc/football/league/mls/index.html　

英超Big6退出歐超聯後，仍然受到大批球迷抗議，一向唔得民心嘅阿仙奴班主高安基亦受到激烈批評。阿仙奴主席祖殊高安基(高安基兒子)周五(23日)出席球迷視像論壇，公開就參加歐超聯嘅決定向公眾道歉，並且承諾母公司(KSE集團)會孭起今次參賽同退賽引起嘅所有罰款，但就強調無意賣盤。

面對球迷要求高安基家族下台，祖殊高安基表示：「我哋明白球迷一直得唔到球迷信任，今次事件更令唔少人失去信心，但我哋相信自己仍然有能力帶領阿仙奴前進，我哋會盡力改善同球迷關係，建立信任嘅橋樑，我哋從來冇考慮過要出售阿仙奴。」

有消息指退出歐超聯嘅球會，將面臨違約訴訟，而球會亦有可能面對罰款處分，祖殊高安基就宣布因歐超聯而引起嘅所有罰款，將會由美國母公司KSE集團一力承擔，唔會影響阿仙奴日常資金運作。