【歐超聯】豪門3級制曝光　墊底竟係呢4隊

最強博彩盤路過關神器《串績王》：http://win.on.cc/football/　

歐超聯計劃雖然已經崩潰，不過就有更多內情曝光，據德國《明鏡周刊》爆料，原來計劃中15支「創辦球會」並唔係「咁高咁大」，根據賽事獎金分配，一眾豪門入面再有「3級制」，皇家馬德里同巴塞隆拿會分「最大份」，而AC米蘭、國際米蘭、馬德里體育會同多蒙特就「最細份」。

據《明鏡周刊》得到嘅歐超聯合約，除咗最初12支宣布參賽嘅球隊外，拜仁慕尼黑、多蒙特同巴黎聖日耳門係另外3隊獲邀加入嘅「創辦球會」，而合約內嘅獎金分配方案，亦包含呢3支最終拒絕參加嘅球隊在內。

合約內獎金分配顯示，15支球隊當中嘅11支，分別會獲發7.7%嘅分紅，唯獨AC米蘭、國際米蘭、馬德里體育會同多蒙特4隊只可以分到3.8%，明顯「低人一等」，至於皇馬同巴塞隆拿兩大西甲勁旅，就會分別額外拎到6,000萬歐元額外獎金，難怪兩隊到依家都仲未肯宣布退出歐超聯。