【東體爭議】唔尊重？阿古路1秒都冇得踢

20210426
  • 東網電視
    更多新聞短片
    (Getty Images)
    最強博彩盤路過關神器《串績王》：http://win.on.cc/football/　
    曼城喺英聯盃決賽以1比0擊敗熱刺，奪得冠軍，領隊哥迪奧拿功不可沒，但係賽後唔少「藍月亮」球迷批評哥帥太不近人情，冇畀阿古路上陣，完全唔尊重呢位球會史上最佳射手。
    由於阿古路將於今季結束後離隊，唔少曼城球迷覺得，阿古路未能最後1次喺溫布萊球場上陣，實在令人遺憾。
    有曼城球迷表示，見到阿古路喺後備席坐足全場，明白係一個時代嘅結束，令人感到難過，但哥迪奧拿起碼應該畀呢位32歲阿根廷老將上陣20分鐘，以感謝佢對球隊嘅偉大貢獻。
    哥迪奧拿今場排出「無鋒陣」，踢到82分鐘，先至靠中堅拿樸迪入波致勝。「藍月亮」入波前，哥帥並冇作出換人，明顯好有信心可以用呢個陣容贏波，事實亦證明佢決定正確。
    其實阿古路今季長期受傷患困擾，實在好難喺呢個關鍵時刻畀佢上陣「告別」溫布萊，相信阿古路應該明白哥帥苦衷。
    幸好曼城喺英超已大幅領先，冇壓力之下，阿古路應該仲有機會喺英超披甲上演「告別賽」。