曼聯自爆　曼城最快下輪奪英超冠軍

東網電視

(Getty Images)

曼聯後上奪冠夢醒！隨着周日紅魔與列斯聯踢成0比0，再失2分，現時英超榜首形勢明朗，曼城領先曼聯10分，嚟緊下輪賽事，只要曼城作客擊敗水晶宮，而曼聯主場輸畀利物浦，藍月即可提前4輪奪冠，如果曼聯和波，曼城亦有99%捧盃！

曼城下輪賽事於周六舉行，作客對處於收咧狀態嘅水晶宮，雖然藍月要應付歐聯，但哥迪奧拿喺輪換上有一手，可以派出強勁嘅輪換陣容落場爭勝，至於水晶宮，未計周一晚對李斯特城，已經手執38分，遠離護級區，拚搏心態不大，曼城對住冇乜鬥心嘅水晶宮，3分應冇問題。

假設曼城周六順利贏波，曼聯就會喺一日之後主場迎戰利物浦，期間曼聯仲要分心應付對羅馬嘅歐霸盃4強大戰，反觀利物浦已經冇歐洲賽喺身，現時唯一目標係爭聯賽前4，呢場雙紅會如果曼聯輸波，曼城將提前奪冠。

如果曼聯和波，曼城亦99%捧盃。因為曼聯和波嘅話，將會同曼城積分拉開到12分，英超同分係計得失球，曼城到時比曼聯至少多+17球，就算曼城最後4輪輸晒，曼聯亦要於最後4輪連場大勝，先有機會奪冠，相當渺茫。

曼城餘下5輪賽程：

5月1日作客水晶宮

5月9日主場車路士

5月13日作客紐卡素

5月15日作客白禮頓

5月23日主場愛華頓

曼聯餘下5輪賽程：

5月2日主場利物浦

5月9日作客阿士東維拉

5月12日主場李斯特城

5月15日主場富咸

5月23日作客狼隊

on.cc東網