雲格自薦　想重返阿仙奴幫手

美職開鑼，即上《美職刨績王》：https://win.on.cc/football/league/mls/index.html　

阿仙奴近年成績欠佳，前主帥雲格獻計，認為會方應該聘請前兵工廠球員回巢擔任管理層，因為只有球員出身嘅人，先至明白球隊需要，佢自己亦樂意用任何方式，協助阿仙奴重建。

雲格2018年結束執教阿仙奴近22年嘅生涯之後，仍然非常關心呢支英超老牌球隊，佢近日話希望有更多前兵工廠球員加入管理層：「我喜歡前球員管理球會，拜仁慕尼黑就係成功例子，否則就要好似曼城咁投入巨額資金，就我個人而言，因為我係1位足球人，我喜歡前阿仙奴球員回巢管理球會，我亦樂意提供相關建議，我永遠支持阿仙奴，會用任何方式去幫助球隊，呢個就係我嘅答案，如果唔需要我，我生活仍然好開心。」

瑞典富豪埃克日前表示願意入主阿仙奴，並有意邀請3位阿仙奴經典名宿柏金、韋拉、亨利加盟，成為新阿仙奴管理層，睇來雲格都支持呢個方案，問題係阿仙奴高安基拒絕賣盤。