RB萊比錫入德盃決賽　拿高斯文要捧盃告別

足球博彩神器，每日重心提供盡在《彩報》：http://win.on.cc/football/　

周六(1日)凌晨德國盃4強大戰，RB萊比錫憑住科斯貝治喺加時最後一刻「絕殺」，作客以2比1擊敗雲達不來梅殺入決賽，下季將轉教拜仁慕尼黑嘅教練拿高斯文，表明希望用冠軍獎盃作為告別RB萊比錫嘅禮物。

主帥拿高斯文日前落實簽約拜仁慕尼黑，不過RB萊比錫爭霸決心不減，今場作客雲達不來梅90分鐘踢成0比0平手，但去到加時賽高潮迭起，南韓前鋒黃喜燦93分鐘為RB萊比錫先開紀錄，但捱唔到半場就因烏柏美卡奴回傳失誤，造就比頓確特為主隊追平。正當球迷等睇互射12碼，後備上陣5分鐘嘅科斯貝治就接應黃喜燦助攻，喺補時1分鐘獻上「絕殺」。

RB萊比錫近年火速上位，但至今仍未贏過任何大賽錦標，今次殺入德盃決賽將係最好機會，教練拿高斯文賽後表示：「呢場係美妙勝利，球員都竭盡所能比賽，過去1個星期發生嘅事未有影響球員，我希望用德國盃冠軍獎盃告別球隊。」RB萊比錫決賽對手，將會係多蒙特或者基爾。