打定輸數?高普話歐霸盃係偉大賽事

20210501
東網電視
更多新聞短片
美職開鑼,即上《美職刨績王》:https://win.on.cc/football/league/mls/index.html 
利物浦今季成績大跌Watt,唔單止衛冕失敗,依家聯賽更加淪落至第6位,距離第4位嘅車路士4分,喺只剩5輪聯賽情況下,「紅軍」領隊高普似乎都打定輸數,仲話下季如果踢歐霸盃,都一樣會全力爭標,大讚歐霸盃都係一個好有份量嘅比賽。
高普喺作客曼聯前嘅記者會表示:「自從我嚟到英超後,只係踢過1次歐霸盃(2016年),當年我哋殺入決賽,所以除咗場決賽之外,歐霸盃嘅回憶都係美好,而且我哋啱啱先見到曼聯好享受歐霸盃嘅勝利(6比2大勝羅馬)!當然要睇利物浦最後參加咩賽事,但我絕對唔會睇小呢個比賽,歐霸盃都係偉大嘅賽事。」
自2016/17球季後,利物浦第1次嚟到季尾冇任何冠軍可以爭取,相反曼城爭緊做「3冠王」、車路士亦爭緊歐聯同英足盃、曼聯同阿仙奴打緊歐霸盃、李斯特城亦入咗英足盃決賽,高普就話:「妒忌其他球隊係弱者所為,我哋要為自己成績負責,呢幾年利物浦爭緊冠軍嗰陣,我唔知其他球隊會唔會妒忌我哋。我哋依家要踢好季尾賽事,然後下季再嚟過。」