麥巴比養傷　尼馬1射1傳拯救PSG

最強博彩盤路過關神器《串績王》：http://win.on.cc/football/　

周六(1日)深夜法甲，巴黎聖日耳門(PSG)缺少養傷嘅射手基利安麥巴比，靠巴西球星尼馬擔大旗，佢射入1球及1次助攻，率領PSG主場以2比1擊敗朗斯，為嚟緊周三(5日)凌晨歐聯4強次回合作客曼城，打下一支強心針。

巴黎聖日耳門踢到33分鐘打開紀錄，尼馬單刀射成1比0，換邊之後，尼馬開出角球，由同屬巴西國腳嘅馬昆奴斯哥利亞頂入，呢位中堅後上攻門能力極強，佢喺上場歐聯4強首回合，都攻入曼城大門，次回合隨時又要靠佢食胡。

雖然朗斯之後由加拿高入番1球，但未能阻止PSG全取3分，巴黎聖日耳門現時落後榜首里爾1分。

另外，基利安麥巴比早前因為小腿受傷，除咗缺陣今場法甲之外，下場歐聯4強次回合對曼城，亦上陣成疑。PSG首回合主場輸1比2，如果冇咗基利安麥巴比，想反勝就更加難。