PSG真大佬　華拉堤叫哥迪奧拿「收嗲」

最強博彩盤路過關神器《串績王》：http://win.on.cc/football/　

巴黎聖日耳門(PSG)近年星光熠熠，由碧咸、伊巴謙莫域到依家嘅尼馬同基利安麥巴比，球隊從來唔缺天王巨星，不過講到PSG多年來真正核心，唔少球迷都會認為馬高華拉堤先係真正靈魂，佢啱啱成為球會史上上陣第3多球員，上場更公然叫曼城領隊哥迪奧拿「收嗲」，盡顯大佬風範。

現年28歲嘅馬高華拉堤，2012年已經加盟PSG，上場聯賽對朗斯後備入替，係佢第345次為PSG喺正式賽事上陣，升上球會史上第3位，紀錄保持者係70至80年代名將比洛加特嘅435場。馬高華拉堤同PSG合約去到2024年，如果佢繼續留隊嘅話，絕對有機會挑戰呢個終極紀錄。

見慣世面嘅馬高華拉堤，喺歐聯4強首回合對曼城期間，被爆曾經公然頂撞哥迪奧拿，當時馬高華拉堤一次攔截後，哥帥向球證投訴話要出示黃牌，馬高華拉堤隨即用西班牙文回應哥迪奧拿：「你想點樣呀？收嗲啦！」霸氣盡現！