堅尼：曼聯留用卡雲尼　即係無心爭冠

足球博彩神器，每日重心提供盡在《彩報》：http://win.on.cc/football/　

曼聯游說卡雲尼留隊一年，據講稍後就會官宣，廣大曼迷都好高興，認為來季鋒線高枕無憂，但前曼聯隊長堅尼唔係咁睇，佢認為曼聯留用卡雲尼，即係無心爭冠，只滿足於歐聯資格同聯賽亞軍。

堅尼嘅睇法係咁嘅：「從某種意義嚟講，我唔希望卡雲尼留隊，因為咁樣會令到曼聯高層認為球隊唔需要搵中鋒，如果曼聯將希望放喺卡雲尼身上，來季爭冠都係算吧啦！34歲嘅卡雲尼只可以做後備前鋒，但佢唔想做後備，加上家庭原因想離隊。」

堅尼亦批評保羅普巴難擔重任，雖然佢近期有起色，但無法持久，仲犯過好多錯誤累街坊，曼聯嘅長遠之計，唔應該着重眼前嘅卡雲尼同普巴，應該將目光放遠啲，喺轉會市場搵合適嘅人。

佢話：「我認為，曼聯需要買入兩位世界級球員，呢件事對於曼城同利物浦同樣困難，而曼聯下一個重要收購，可能係哈利卡尼，或者基亞利殊，佢哋都可以提升進攻水平，雖然曼聯依家都唔錯，但下一步亦係最困難嘅一步，就係要贏聯賽冠軍。」