韋斯咸反勝般尼　英超前4未絕望

足球博彩神器，每日重心提供盡在《彩報》：http://win.on.cc/football/　

周二(4日)凌晨英超大戰，近期連輸2場嘅韋斯咸作客2比1反勝般尼，依家只係落後第4位嘅車路士3分，殺入前4進軍歐聯嘅美夢仍未破滅。韋斯咸今場贏波英雄唔係連格，而係英超「頭槌王」米查利安東尼奧！

今場3個入波全部喺上半場出現，般尼前鋒基斯活特19分鐘博到12碼，佢親自操刀先開紀錄。韋斯咸失守後如夢初醒，米查利安東尼奧2分鐘後即頭槌頂入追成1比1，呢位英格蘭前鋒29分鐘再接應賓華馬傳中近期射入，協助韋斯咸反勝2比1完場。

韋斯咸領隊莫耶斯賽後表示，爭取歐聯資格仍然係最大目標：「球隊表現好好，比起2比1呢個賽果更好，能夠出戰歐洲賽將係一個偉大成就，我哋同歐聯席位亦都非常接近，球員要相信自己可以做得到。」米查利安東尼奧自2015年英超首演後，至今已有19個頭槌入波，同基奧特、哈利卡尼並列同期英超「頭槌王」。