西維爾慘情輸波　西甲爭霸4變3

美職開鑼，即上《美職刨績王》：https://win.on.cc/football/league/mls/index.html　

西甲爭標形勢再有變化，原本馬德里體育會、皇家馬德里、巴塞隆拿同西維爾4隊競逐冠軍，但隨住西維爾周二(4日)凌晨主場0比1輸畀畢爾包，爭冠機會即刻變得相當渺茫，只剩4輪聯賽下落後「西甲3雄」4至6分，爆冷捧盃難度極高。

西維爾挾聯賽5連勝強勢衝刺，今仗主場出擊全場圍攻畢爾包，可惜把握力差勁，全場17次攻門只有3次命中目標，52分鐘捷西斯拿華斯傳中省中巴倫斯加隻手，球證亦未有表示。西維爾久攻不下，反而喺90分鐘被伊拿基威廉斯偷襲得手，主場慘輸0比1。

西維爾教練盧比迪古賽後因為向球證激烈投訴未獲12碼，結果被出示黃牌警告，盧比迪古因為累積5面黃牌將自動停賽，意味佢將無緣領軍出戰下周一凌晨作客皇家馬德里嘅大戰。