皇馬歐聯入唔入到波 阿辛斯奧成關鍵人物

2021年05月04日 20:04
東網電視
更多新聞短片
(Getty Images)
美職開鑼,即上《美職刨績王》:https://win.on.cc/football/league/mls/index.html 
皇馬將於周四(6日)凌晨歐聯4強次回合作客車路士,雙方首回合打和1比1,皇馬被對手取得1粒作客入球,意味今場必須入波,先至有望晉級。「銀河艦隊」進攻球員之中,馬高阿辛斯奧屬於爭取入波最關鍵人物。
雖然皇馬今季入波最多球員係賓施馬,但亦因為佢目標太大,勢必遭車仔嚴密防守。至於其他進攻球員之中,2位新星雲尼斯奧斯祖利亞、洛迪高高斯水準不穩,加上經驗尚淺,難當大任,至於夏薩特長期缺態,更加靠唔住,所以馬高阿辛斯奧肩負為皇馬創造入球嘅重任。
呢位25歲西班牙翼鋒效力皇馬以來,捧過2次歐聯冠軍,其中2017年決賽取得入球,2018年4強首回合對拜仁慕尼黑,亦有波入,可以話係天生大賽球員。同埋佢除咗入波之外,亦擅長個人突破,為隊友創造機會,屬於射得又傳得嘅全面進攻手。
雖然馬高阿辛斯奧2019年夏天受重傷,缺陣上季大部份賽事,但佢今季已經走出傷患陰霾,並頻頻建功,包括歐聯16強次回合對阿特蘭大,以及8強首回合對利物浦,都取得入球,成為晉級功臣。
馬高阿辛斯奧喺4強首回合僅後備上陣,來到今場生死戰,相信教練施丹會派出呢位猛將擔正,盡地一煲,阿辛斯奧隨時可以再做球隊英雄。