曼聯可升到70億鎊！格拉沙家族唔賣

足球博彩神器，每日重心提供盡在《彩報》：http://win.on.cc/football/　

日前曼聯球迷在奧脫福示威行動，結果換來曼聯會方一份避重就輕嘅聲明回應，會方未有動搖，主要原因係曼聯實在太好賺！英國《衞報》報道，格拉沙家族無意出售曼聯，仲睇好球會將來可升值至70億鎊，實行當曼聯係提款機！

早前有消息稱，格拉沙家族將以40億鎊出售曼聯，以平息眾怒，不過最新報道指出，格拉沙家族打算繼續管理曼聯，因為現今環境咁惡劣，曼聯仍然可以賺大錢，現時球會價值大約係30.5億鎊，預測將來可升值至70億鎊，試問佢哋點捨得放手！

曼聯近年成績一般，不過自從活華特擔任曼聯高層後，球會收益節節上升，令曼聯成為全球最有價值10間球會之1，並且可以繼續賺大錢。

球迷一直不滿格拉沙家族視曼聯為提款機，早前加入歐超聯激發球迷不滿情緒，日前「雙紅會」發起示威行動，不過曼聯在事發一日後嘅回應似乎無意平息事件，更表示要檢查保安系統，考慮向犯罪球迷施以禁止觀賽等懲罰，令事件火上加油。