冤家路窄　2位曼聯舊將遇「寸王」冇運行

足球博彩神器，每日重心提供盡在《彩報》：http://win.on.cc/football/　

意甲球隊羅馬日前宣布，聘請葡萄牙名帥摩連奴成為下季新教練，但「寸王」未開始教波，可能已經先引發內亂，因為羅馬陣中2位前曼聯球員基斯史摩寧、米希達利恩過去同摩連奴有「牙齒印」，隨住「寸王」執掌帥印，呢2位仁兄可能冇運行。

摩連奴2016至18年執教曼聯期間，曾經質疑基斯史摩寧唔夠專業，而且缺乏爭勝決心，甚至取笑呢位中堅身體質素差。至於米希達利恩雖然同摩連奴關係唔算差，但問題係呢位阿美尼亞國腳當年喺「寸王」麾下一直踢唔出應有水準，佢亦承認唔適應摩連奴戰術，最後轉投阿仙奴。

時至今日，基斯史摩寧、米希達利恩都屬於羅馬主將，一直表現出色，基斯史摩寧甚至被球迷稱為「英格蘭馬甸尼」，至於米希達利恩係球隊進攻大腦，佢今季意甲已入9球，屬於羅馬次席射手。因此，摩連奴執教羅馬之後，如果未能解決同呢2位攻守主將嘅矛盾，好難帶領羅馬翻身。