曼聯避過判輸一劫　雙紅會5.14補賽

美職開鑼，即上《美職刨績王》：https://win.on.cc/football/league/mls/index.html　

原定於上周日(2日)晚舉行嘅英超「雙紅會」曼聯主場對利物浦，因為賽前有大批球迷衝入球場抗議，導致踢唔成，賽會依家宣布呢場大戰將於香港時間5月14日凌晨3時15分進行補賽，意味曼聯唔會被判輸波。

當日有數千曼聯球迷喺賽前去奧脫福球場示威，約200球迷衝入球場「佔領奧脫福」，有人更向《天空體育》直播室投擲火燄彈。賽事被逼取消之後，一度傳出曼聯可能會受到處分，甚至被判輸波。

不過，英超賽會決定網開一面，只係進行補賽了事，改期之後，曼聯將陷入「地獄賽程」，需於7日內踢4場比賽，包括香港時間5月7日凌晨歐霸盃作客羅馬，5月9日晚作客對阿士東維拉，5月12日凌晨主場對李斯特城，5月14日凌晨主場對利物浦。