迪姆華拿小丑變英雄　施華嫂：你是最好的！

足球博彩神器，每日重心提供盡在《彩報》：http://win.on.cc/football/　

車路士前鋒迪姆華拿今季充滿爭議，雖然佢對球隊貢獻一直唔細，但就經常浪費入球機會，歐聯4強首回合對皇家馬德里門前6碼失機，更加成為全球笑柄。今場生死戰迪姆華拿就交足功課，更加頂入先開紀錄嘅一球，成功令所有批評者收聲，連首回合曾寸爆迪姆華拿嘅「施華嫂」，都改口大讚：「你是最好的！」

迪姆華拿今季各項賽事，為車路士貢獻12個入波同10次助攻，成績表絕對見得人，車仔對上一個單季有入波+助攻「雙位數」球員，就係18/19球季嘅夏薩特。車路士領隊杜曹一直堅持重用迪姆華拿，當然係睇到佢入球以外嘅貢獻，今場迪姆華拿嘅入波雖然簡單，但就相當重要，可以話吐氣揚眉。

首回合賽後，堤亞高施華老婆Isabele喺社交網鬧爆：「呢個人(華拿)係一個擺設，射極都唔入，佢叫咩名，佢叫蟲呀！」時隔1個星期，Isabele今場賽後又拍片，但口風就轉晒：「迪姆華拿，非常好！呢樣就係我講嘅嘢，你識得入波嘅，你是最好的！老友！」