復出都冇用　拉莫斯或最後1次為皇馬踢歐聯

足球博彩神器，每日重心提供盡在《彩報》：http://win.on.cc/football/　

皇馬隊長沙治奧拉莫斯趕及復出，以正選身份踢周四(6日)凌晨歐聯4強次回合作客車路士，但表現麻麻，未能阻止球隊輸波出局。呢位35歲老將已無復當年之勇，加上仍未同球會達成續約協議，或於今夏自由身離隊，意味今場好可能係佢最後1次為皇馬踢歐聯。

沙治奧拉莫斯近期積極備戰，終於克服傷患問題，復出踢今場生死戰，但呢位中堅明顯未操起狀態，面對車路士球員嘅衝擊，顯得力有不逮，佢8次同對手爭頂，只有3次頂贏，防守亦慢一拍，上半場37分鐘更因為粗野侵犯艾斯派古達，被球證出示黃牌。

沙治奧拉莫斯踢到比賽後段，亦出現體力不繼情況，冇晒以往後上助攻埋門嘅鬥志。

由於皇馬另1位中堅艾達米列達奧今季表現出色，加上華拉尼仍然當打，相信2人將成為球隊未來中堅組合，令沙治奧拉莫斯重要性大減，會方對於佢喺續約問題上「跳草裙舞」，亦失去耐性，或會干脆放棄沙治奧拉莫斯，以便球隊進行重建。