寸王效應！航空公司轉軚同羅馬續約

足球博彩神器，每日重心提供盡在《彩報》：http://win.on.cc/football/　

寸王效應果然厲害！羅馬早排官宣摩連奴下季執教之後，原本唔願同球隊續約嘅贊助商卡塔爾航空，近日轉軚話可以同羅馬續約至少一年，呢個世界就真係咁現實。

摩帥被熱刺炒咗之後，短短半個月就搵到四份工，其中最重要當然係去羅馬執教做主帥，有寸王助陣呢支球隊嘅商業價值即刻升價。羅馬原本同球隊主要贊助商卡塔爾航空，一直傾續約問題都無乜進展，甚至有機會「分手」，但球會官宣摩連奴入主後，航空公司即主動話至少簽約一年，羅馬下季成績點樣要踢過先知，但起碼摩帥已經幫佢哋解決咗贊助問題啦。