首相出招 呼籲UEFA改喺英國舉行歐聯決賽

2021年05月08日 13:02
東網電視
更多新聞短片
(Getty Images)
美職開鑼,即上《美職刨績王》:https://win.on.cc/football/league/mls/index.html 
今屆歐聯決賽曼城對車路士,原本安排香港時間5月30日凌晨喺土耳其伊斯坦布爾舉行,但由於土耳其嘅新冠肺炎疫情嚴重,被英國列入「紅色名單」地區,球迷去完當地睇波,返回英國後,需要入住酒店隔離10日,對球迷造成不便及財政負擔,英國首相約翰遜認為,呢場「全英決賽」安排喺英國踢比較合理,呼籲歐洲足協(UEFA)轉場,據悉紐卡素嘅聖占士公園球場、熱刺嘅托定咸熱刺球場、阿仙奴嘅酋長球場,都有機會成為決賽場地。
約翰遜接受英國傳媒訪問時話:「歐聯係歐洲最頂級賽事,2支英超球隊打入決賽,如果英國球迷唔可以去睇,絕對係一種恥辱,其實可以喺番英格蘭舉行,我想幫助雙方球迷入場睇波。」
據悉,如果歐聯決賽喺英國舉行,可以畀15,000人入場,但喺土耳其伊斯坦布爾舉行,只可以有8,000人入場,最重要係改喺英國踢,對曼城及車路士嘅職球員、球迷都方便好多。
不過,歐洲足協喺贊助商、宣傳及場地安排等多項因素要兼顧,如非必要,都屬意一切按計劃進行。