好近啦！羅拔佬差1球就平梅拿紀錄

足球博彩神器，每日重心提供盡在《彩報》：http://win.on.cc/football/　

拜仁慕尼黑喺周日(9日)凌晨開波前，已經知道可以穩奪冠軍，但仍然全力以赴，主場以6比0大勝慕遜加柏，前鋒羅拔利雲度夫斯基射入3球，呢位波蘭國腳今季德甲已經有39球進帳，距離梅拿49年前創下嘅單季德甲入40球嘅紀錄，只差1球。

「羅拔佬」開波2分鐘就建功，踢到34分鐘梅開二度，並於65分鐘主射12碼入網，完成今季第5次帽子戲法。佢今場仲有1次助攻，傳畀京士利高文射入，換言之拜仁6個入球之中，有4球由「羅拔佬」創造。

羅拔利雲度夫斯基今季踢27場聯賽已入39球，效率非常驚人，如非早前受傷抖咗一排，應該一早已經入球「40+」。

德甲史上單季最多入波嘅神射手係1971/72年球季嘅拜仁名宿梅拿，佢該季射入40球。拜仁今季仲有2場聯賽，對手只係弗賴堡、奧格斯堡，「羅拔佬」要再入多2球，打破梅拿嘅紀錄，應該冇問題。