港超聯　基華尼頓中三元　理文4球大破晉峰

「中銀人壽香港超級聯賽」已經來到第2循環最後階段，周日(9日)頭場先由理文於深水埗運動場火併晉峰。理文上半場憑基華尼頓一記妙射，以及黃俊皓射入今季「開齋波」，以2球領先。下半場基華尼頓再入2球，個人上演「帽子戲法」，帶領理文以4比0大破晉峰，取得2連勝，踢多1場下暫時落後天水圍飛馬1分。

理文為了力追頭3名，今仗排出強陣。左閘徐宏傑刑滿復任正選，荷西安祖推前一格踢防中，3箭頭則繼續有基華尼頓、洛迪古斯及金承龍。至於晉峰為迎接第3循環，今仗則有少量輪換。中堅由何浚皓夥拍艾拔簡勞，林富貴任單防中，左右2翼彭軍凡及黃偉國，全力支援正前鋒費利浦薩。

比賽初段晉峰嘗試主動進攻，先有費利浦薩禁區外遠射高出。7分鐘晉峰中路搏得罰球，佐敦布朗斬入禁區，艾拔簡勞再頭槌二傳，可惜鄭璟昊射門同樣不中目標。3分鐘後黃偉國左路斬中，劉君正尾柱窩利一射，亦告柱邊出界。19分鐘理文換入李康廉，頂替受傷的洛迪古斯，隨即收到成效，亞哥斯達斬前柱，李康廉頭槌僅僅頂高。21分鐘理文率先打開記錄，基華尼頓接應金承龍直線，禁區外突放冷箭，皮球彈內柱破網，理文領先1比0。理文領先後攻勢浪接浪，35分鐘金承龍斬中，荷西安祖近門一頂，可惜被林駿杰神勇撲出。臨完半場前理文把握反擊機會擴大比數，黃俊皓後上接應李康廉傳送，單刀射破林駿杰十指關，兼取得今季個人「開齋波」，最終理文領先2球返入更衣室。

落後的晉峰下半場積極反撲，53分鐘主力費利浦薩右路推入大位起腳， 被門將袁皓俊橫身救出。3分鐘後晉峰錯失黃金機會，費利浦薩左路傳中，可惜黃偉國的頭槌被徐宏傑成功護空門，未能追近比數。理文捱打下換入傷愈復出的主力顔樂楓，70分鐘「光頭」殺入禁區橫傳，尾柱基華尼頓鏟射得手，理文遙遙領先3比0。75分鐘基華尼頓接應李康廉直線，推過何浚皓後射入遠柱，今仗個人連中三元，晉峰短時內連失2球。比賽尾段雙方未有增添入球，理文維持4比0勝局。

理文連續2仗大勝，主教練陳曉明認為球隊之前失分，主要因為球隊在製造埋門機會後，經常射失或者中柱中楣，今仗埋門把握力明顯提升，在射門次數不多下仍能把握僅有機會。惟「曉明sir」卻對目前受傷兵困擾感擔心：「上場冇咗沙普夫，今場洛迪古斯又傷咗，尤其嚟緊賽期咁密，始終外援對球隊好重要。」

晉峰上半場初段表現不錯，可惜最終再次落敗，總教練何信賢不滿球員再次犯錯，認為球員在失球後心態明顯有所放鬆：「犯錯依個問題成季都有，有啲我覺得係職業球員唔會犯嘅錯，今場落後之後成個戰術體系冇哂，本身前鋒把握力已經弱，再失咁嘅波會好洩氣，依家我哋仲諗緊辦法改善。」球隊早前經歷2連勝後，最近2場同樣大敗而回，「何sir」承認球員個人能力不足，希望球員能加強臨場應變能力。晉峰目前取得12分，「何sir」則坦言有點慚愧：「基本上我哋唔失波就唔會輸波，甚至贏波，但球隊失咗超過30球波，依個問題好難辭其咎，好似對方今日射門機會唔多，但一射就入。」「何sir」表示即使對手大多是外援，惟球員亦應有足夠經驗去解決。

除此之外主力茹子楠對落敗亦感失望，他認為球隊能夠踢出自身風格，可惜卻差埋門最後一腳，加上大家在疲態下有點不集中，然而這就成為勝負開鍵。「茹子」又指球隊即使大敗，仍會繼續保持球隊一貫踢法：「因為我哋係試過用依個風格去贏波，希望之後可以穩定啲，或者輸都唔好話失咁多球。」