港超聯 開齋兼奠勝 杜度 :終於入波!

20210509
東網電視
更多新聞短片
(設計對白)杜度:「畀我靜吓!」 (李浚湣攝)
港超聯周日(9日)尾場,由東方龍獅於主場旺角大球場迎戰愉園,半場2隊踢成1比1平手,下半場東方靠杜度頂入奠勝一球兼個人今季「開齋波」,最終以2比1險勝。賽後這名巴西防守球員相當開心,笑言入球終於來到!
這球頭槌是杜度今季的「開齋波」,賽後他笑言入球「終於嚟到」:「我之前季季都成日入好多波,不過今季等耐咗,希望依球唔係唯一同最後一球。」除此之外Dudu對能夠在母親節入球感到格外高興,更希望將入球的喜悅分享給天下間所有母親。
杜度入球後特意面對鏡頭,做出將手指塞進耳朵的慶祝動作,他承認有特別意義:「全球都有好多唔穩定嘅因素,好多人可能會有啲唔好同負面想法,希望外界唔好加多把口,令佢哋更加正面。」
對於東方龍獅只能僅勝,Dudu認為今仗相當艱難,球隊未有發揮出最佳水準,但對能夠全取3分感滿意。第3循環即將開打,Dudu表示全隊上下需要更加專注,以及改善今仗暴露出的問題,盡快作出改善。另外杜度今仗被推前一格,客串防守中場,他坦言問題不大:「雖然我主要踢中堅,但中場當然都冇問題啦,仲可以易啲上前入到波,不過要係咁跑都幾困難。」Dudu更指只要球隊有需要或教練要求,自己並不介意出任任何位置。