祖雲達斯吞3蛋 C朗下季冇歐聯踢?

20210510
東網電視
更多新聞短片
美職開鑼,即上《美職刨績王》:https://win.on.cc/football/league/mls/index.html 
稱霸意甲多年嘅祖雲達斯今季大跌Watt,睇住國際米蘭喺佢哋手上拎走聯賽冠軍後,祖雲達斯依家更面對無緣歐聯嘅危機!祖雲達斯周一(10日)凌晨主場慘吞AC米蘭3蛋後,聯賽已經跌到落第5位,今季表現差勁嘅C朗拿度,過去18年從未缺席過歐聯,但下季有機會嘗到呢個滋味。
祖雲達斯今場表現冇厘神氣,上半場補時階段,AC米蘭由巴謙戴亞斯妙射先開紀錄;換邊後祖雲達斯仍無起色,雖然門將施捷斯尼56分鐘救出基斯爾嘅12碼,但最後亦難逃大敗,列比錫同湯姆利尾段為AC米蘭各建一功,最終「紅黑兵團」大勝3比0。
意甲前4爭逐形勢緊湊,阿特蘭大(72分)、AC米蘭(72分)、拿玻里(70分)、祖雲達斯(69分)同拉素(64分,踢少1場)都有機會競逐3個歐聯名額,不過祖雲達斯之後仲要對國際米蘭,形勢相當凶險。C朗近期狀態麻麻,今場更加未有任何中龍埋門,佢自03/04球季開始年年都有份踢歐聯,唔通下季斷纜?