37歲洛賓貢獻2次助攻　激動到喊

足球博彩神器，每日重心提供盡在《彩報》：http://win.on.cc/football/　

荷蘭「傳奇快翼」洛賓喺周日(9日)晚荷甲，貢獻2次助攻，協助格羅寧根作客以4比0大勝安曼，今場波係呢位37歲老將自上年9月之後，首次踢正選，並有出色表現，證明自己寶刀未老，難怪心情特別激動，更不禁流下男兒淚。

洛賓曾於2019年7月宣布掛靴，但1年之後又決定復出，加盟母會格羅寧根。不過，年紀大機器壞，洛賓上年9月開始受到傷患困擾，上陣時間唔多，相隔大半年之後，今場終於可以踢正選，佢2次傳送，造就達告魯斯梅開二度。

賽後洛賓表現非常激動，佢話：「我就好似小朋友咁，我好想踢波，但好困難，我會繼續奮鬥，總會有回報。」佢講講下，仲喊咗出來，可見洛賓心中仍然非常熱愛足球。