港超聯　正式成為入籍兵　保羅：等咗好耐

港超聯周一（10日）獨腳戲，傑志最終以4比1大勝冠忠南區，然而焦點卻落在傑志門將保羅身上，事關這名出生於巴西的門將，已經正式入籍香港，今仗亦以本地球員身份正選上陣！賽後他直言「等咗好耐」，同時對再次獲上陣機會感到高興。

保羅2013年來港發展，曾效力東方、公民、標準流浪及和富大埔等球會。然而2017年離開和富大埔後，上陣機會並不穩定，直到2018年才加盟傑志。事隔多年保羅終於取得「特區護照」，正式入藉為本地球員，他直言「等咗好耐」：「我好開心，自己等咗本護照好耐，多謝之前效力過嘅咁多間球會，尤其係傑志啦，佢哋係申請護照方面，畀咗好大支持同幫助我。」

由於王振鵬上仗勇戰受傷，傑志總監兼總教練朱志光在顧及對手的高空攻勢下，決定起用身高達1米94的保羅擔任正選門將。相隔2年零33日再度重返球場，兼首次為傑志上陣，保羅對此表示相當開心，認為自己上下半場皆作出不少撲救，對今仗表現感滿意。臨完場前保羅一度抽筋，他笑言自己久未上陣，加上賽事屬於「大戰」，抽筋亦相當正常。