英超護級戰落幕　富咸輸波篤定降班

最強博彩盤路過關神器《串績王》：http://win.on.cc/football/　

英超護級戰場塵埃落定，富咸周二(11日)凌晨主場0比2不敵般尼後，只剩3輪賽事下距離安全區10分，數字上已經肯定追唔上，提前宣告護級失敗。富咸3年內第2次喺英超降班，慘成「升降機」，下季將同西布朗、錫菲聯一齊落英冠比賽。

錫菲聯同西布朗已先後降班下，尾3嘅富咸主場迎戰賽前排尾4嘅般尼非勝不可，而且輸波就會即刻降班，雖然富咸借主場之利控制戰局，但35分鐘就被艾殊利韋斯活特攻陷，完半場前再被基斯活特轟爆，大勢已去下最終以0比2落敗，正式降班。

富咸喺2018年升上英超，狂花超過1億鎊增兵後仍護級失敗，2019年降番落英冠，2020年再次升班閃電重返英超，估唔到又經歷多一次降班噩夢，領隊柏加賽後表示：「我好傷心，雖然降班嘅危機已經出現咗成季，但最後未能成功確實令人好失望。富咸要重新檢討發展方針，我哋不斷升班、降班、升班、降班，依家要諗下點樣喺更高水平比賽生存，呢個係未來最重要任務。」