麥巴比復出「起孖」　PSG驚險入法盃決賽

足球博彩神器，每日重心提供盡在《彩報》：http://win.on.cc/football/

巴黎聖日耳門周三深夜出戰法國盃蒙彼利埃，贏得驚險要靠互射12碼險勝躋身決賽，基利安麥巴比傷愈復出第一擊表現神勇，為球隊攻入兩球，成為贏波功臣。

麥巴比喺10分鐘就為聖日耳門打開紀錄，佢接應隊友妙傳高速跑入對方禁區抽射入網，但敵方喺上半場完場前追平，半場1比1入更衣室，換邊後狀態甚勇嘅麥巴比開波5分鐘又有進賬，自己殺入敵方禁區避過兩個後衞射入，為球隊再領先2比1，但蒙彼利埃於83分鐘嘅一個反擊，追成2比2，兩隊喺法定時間內平手，賽事直接以12碼決生死。

今場「起孖」嘅麥巴比冇射12碼，事關佢喺完場前8分鐘被換出，由摩斯堅恩補替，而雙方喺「生死決」頭五輪都齊齊命中，但去到第六輪蒙彼利埃嘅祖利亞森比亞射失，摩斯堅恩一射破網，PSG12碼贏6比5，並以總計8比7獲勝晉級。聖日耳門將於決賽面對摩納哥或法乙球隊華倫西恩斯嘅勝方，力爭捧盃。