40球達成!羅拔佬追平梅拿神人紀錄

20210516
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
周六(15日)晚德甲,提早奪冠嘅拜仁慕尼黑雖然作客被弗賴堡逼和2比2,但射手羅拔利雲度夫斯基都有1球進帳,呢位波蘭國腳今季聯賽已經轟入40球,追平拜仁名宿梅拿1971/72年球季單季德甲最多入球紀錄。
拜仁慕尼黑喺26分鐘打開紀錄,弗賴堡後衞古比拿防守角球時,拉跌拜仁中場湯馬士梅拿,球證睇完VAR之後,判罰12碼。羅拔利雲度夫斯基主射入網,終於同德國著名射手梅拿睇齊,一班職球員好識做,喺場邊列隊鼓掌向佢致敬,「羅拔佬」亦走埋去擊掌慶祝。
不過,弗賴堡好快由中堅古爾迪頂入角球扳平,換邊之後,拜仁翼鋒基拿比曾經近門剷入,但越位在先食詐胡,其後利萊辛尼射入,為呢支勁旅領先2比1。踢到81分鐘,弗賴堡左閘基斯甸根達近門頂入逼和拜仁2比2。
雖然羅拔利雲度夫斯基今場未能為拜仁贏波,但佢對於追平梅拿49前年嘅紀錄,仍然非常興奮,佢話:「我實現一個曾經幾乎不可能想像嘅目標,為拜仁創造歷史,將來可以當故事講畀小朋友聽,我感到無比自豪。」
羅拔利雲度夫斯基亦成為二戰之後,歐洲5大聯賽之中,第8位單季聯賽入球「40+」球員,同埋佢只要下場德甲煞科戰主場對奧格斯堡,再入1球,就可以打破埋梅拿嘅紀錄。