里爾1分力壓PSG 法甲煞科有好戲睇!

2021年05月17日 13:02
東網電視
更多新聞短片
美職開鑼,即上《美職刨績王》:https://win.on.cc/football/league/mls/index.html 
法甲近年最刺激嘅一季,「1哥」里爾周一(17日)凌晨主場被聖伊天悶和0比0,仍然以1分領前次席嘅巴黎聖日耳門(PSG),里爾只要喺下周一(24日)深夜煞科戰作客贏昂熱,就可以打破PSG壟斷,時隔10年再贏法甲冠軍。
今輪前有3分優勢嘅里爾,最後兩場拎到4分就可以封王,但今仗主場對聖伊天表現失準,大部份時間佔上風下入唔到波,包括完場前攻門冇運中柱,最終只能夠踢成0比0平手。如果佢哋今場贏波,煞科戰作客昂熱和波都掂,但依家就只有贏波先肯定封王,教練加迪亞賽後表示:「今場我哋踢得好一般,唔可能期望會有好成績,但我哋仲有1分優勢,如捧盃嘅話下場只有贏波一條路可以行!」
巴黎聖日耳門(PSG)周一主場對蘭斯,喺對手10分鐘就有球員被逐情況下,憑住尼馬、基利安麥巴比、馬昆奴斯哥利亞同摩斯堅恩各入1球,大勝對手4比0。至於第3位嘅摩納哥主場2比1贏雷恩,數字上仍然有捧盃希望,但佢哋落後里爾3分,而且得失球差亦大落後,要望里爾同PSG齊齊輸波,摩納哥仲要喺煞科戰作客狂勝朗斯,機會渺茫。