愛華頓畀17歲新丁打爆　歐洲賽資格危危乎

足球博彩神器，每日重心提供盡在《彩報》：http://win.on.cc/football/　

周一(17日)凌晨英超賽事，愛華頓主場面對篤定降班嘅包尾球隊錫菲聯，意外以0比1輸波，依家只係排第8位，落後前面熱刺同韋斯咸3分，爭取來季歐洲賽資格漸趨渺茫。錫菲聯今場靠17歲迎星丹尼爾謝比臣一箭定江山，創造英超紀錄。

愛華頓今季主場成績極差，近11場聯賽主場只有1勝3和7負，係球隊未能進佔更前位置嘅主要原因，領隊安察洛堤賽後表示：「輸咗呢場，愛華頓下季踢歐洲賽機會大減，我解釋唔到球隊主場發生咗咩事，我會為呢個成績負責，希望球員都會負責，因為我覺得好羞家。」愛華頓周四(20日)凌晨會主場對狼隊，到時會有球迷入場，安察洛堤希望球迷打氣可以令主場成績提升。

至於錫菲聯今場派出17歲新星丹尼爾謝比臣首次擔正，佢亦不負所託一箭定江山，成為英超史上最年輕首次正選入波球員(17歲309日)，亦係自2009年曼聯前鋒馬捷達後(17歲232日)，英超最年輕攻入致勝球球員。