紅軍大鑊！迪亞高祖達因傷提早收咧

美職開鑼，即上《美職刨績王》：https://win.on.cc/football/league/mls/index.html　

利物浦取得英超3連勝之後，爭入前4位機會大增，但同時亦傳來不利消息，領隊高普透露，前鋒迪亞高祖達喺日前「雙紅會」作客曼聯，勇戰受傷，將會缺陣今季餘下賽事。

高普喺上場對西布朗嘅賽前記者會上話：「迪亞高祖達受咗傷，骨頭出現問題，傷勢唔算嚴重，但估計難以出戰今季餘下賽事。」呢位24歲葡萄牙國腳上年夏天由狼隊加盟利物浦之後，表現大勇，為紅軍各項賽事上陣29場入13球，包括日前英超射入曼聯大門，協助利物浦贏4比2。

迪亞高祖達缺陣之下，勢必削弱利物浦入球能力，上場對西布朗要靠門將艾利臣比加補時入波，先至險勝2比1，就係最佳例子，利物浦餘下2場英超對般尼、水晶宮，真係要打醒十二分精神。